بدر الجنوب و بدر الشرق واحد 

إهداء لأبو مشبب عمر بن مشبب آل عيبان القحطاني بمناسبة تخرجه من جامعة البترول

22-01-1429 هـ 

يا مســا الأشعار جمِّل من قصدها .. وادلهْ بخـــاطر سليلين المجايد

جلسةٍ تسوى سحبْ جات برَعَدها .. مع نسلْ أجوادْ هـــاوين الشدايد

مْبهّرات الهيل لا ياقــف مددها .. و صبّ له فنجـالْ، لو هزّه بوعايد

جيت أبَوْرِد فكرةٍ محدن وردها .. و احسب اني لاجدد الأفكار صايد

ما وعيت إلا وانا راسم جســـدها .. مْركّباتٍ فوقــها نـــــاقص وزايد

ذهني المسكيــن تـــوّه ما طردهــا .. متّخذ من يومــها موقف محــايد

ذكريات، الوقت لو يكفي سردهــا .. بعضها عن بعضها هيّن و كـايد

غترتي من كثْرها زادت عقدها .. و امتلى الدرج بقصاصات الجرايد

يا سفير البسمـة و سيّد بلــدها .. يا بياض الصفحة في عصر السوايد

لانتختْ بك نفسْ، تستبشر سعدها .. يا شموخ العــزّ يــوم الذّلّ ســايد

تشهد الاوقات من قبــل و بعدهــا .. للفريـــــد اللي تميّــــز بالفـرايــد

له علينا ديــونْ ما نوفي سددهـا .. من كثرْ مـا اْعطى وأرهى بالفوايد

يا سعدها، اللي ابو مشبب ولــدها .. و يا سعدها اللي لها رجل و قايد

ذيبْ وابن الذيـبْ، و الطيبة بجدهـا .. يسّر الله خطوته رايح و عايـــد

..

 ياسر بن خالد الدعيلج الخريصي