هاجر الكثير من قرية (سقف) و (الغزالة) من قبيلة شمر إلى الجزيرة (منطقة ما بين تركيا وسوريا) بحثاً عن العيشة و النعيم. و من ضمن المهاجرين كانوا آل عمود بقيادة فايز بن سلامة بن هذيل. و بعدها بدأت المضايقات و التحرشات من بقية القبايل للضعفة اللي ما قدروا يهاجرون و من ضمنهم الشاعرة وحيشة المشلحية. و بعد فترة سألها واحد من عيالها عن كثرة الشيب اللي براسها، فقالت:

قالت وحشيه يا ملا ليه ماشيـــب          غرس الجـدود اللي غدى وقت الافلاح

يا غيبـة ابن هذيل يا غيبـة الذيب          شفنـا النكايـــر و النكد عقب ما راح

روّح على حمرا تجيبه تحاضيــب          تجدع يدينـــه بالخـــلا تقل زنــاح

حمرا هميم من خيـار المناجيــب         أكواعهـا عن لمسة الزور طفـــــاح

حمراء ليـا نيشـت بروس العراقيب         أسبـــق من الشيهان لا شاف ملـــواح

ركـابها من عزوتي من هل الطيـب         ضـد الحريب لا صاح بالنزل صيـــاح

اربــع ليال صـدق ماهـن تكاذيــب         تلفي على ابن هـذيل كســاب الأمداح

قل ديرتك (سقف) تلتهـا الاجانيب         يضوي عليهــا من الشعب كلا مصلاح

جانــا ضعنهم مع دبشهم جنــاديب         صـار الخطر منهـــم علينـا بالأرواح

عجّل علينــا ياحصــان الأطــاليب         لــك هدة تاخذ على الخيــل مسراح

ويوم وصلت هالقصيدة لابن هذيل و قراها و شاف ان المرة تنخاه، جلس يفكر.. هو يعرف ان جماعته معينين خير بالديرة اللي هم بها يقال لها (نقرة أيوب) وهو ما يقدر يسوي شي لوحده.. يوم قال للي بجنبه:

وش هقوتك مداد من نقـرة أيوب         العصـر ما يمسي حوال الغـزاله

على اشعـل طلق الذراعين مرعـوب         أسرع من الشيهـان معـلف عياله

قال له اللي بجنبه: وينك ووين الغزالة؟ بينك و بينه ما يبيد السمينة.. يوم يتركا على الارتكاية و يجلس يفكر.. و بعد ساعة يقهوونه “تقوه يالامير” والا هو ميت!! مات من القهر لانه ما قدر يلبي نخوة المشلحية